Savn

Korona og skúlin oktobur 2021

Næmingar og starvsfólk, ið hava verið uttanlands, skulu ikki longur í sóttarhald eftir at hava verið í útlandinum. Mælt verður tó til at tey vísa varsemi og serlig atlit mótvegis felagsskapinum til tey hava úrslitið av kanningini á øðrum degi eftir heimkomu tøkt.

Skúladagurin

Skúladagurin er skipaður sum vanligt og allir næmingar, lærarar og námsfrøðingar fylgja dagligu tímatalvuni og arbeiðsuppgávunum. 

Í fríkorterum og á felagsøkjunum ferðast vit øll, men minnast til reinføri, frástøðu í tann mun  tað ber til og vanligt vit og skil.

Gestir í skúlatíð 

Myndugleikarnir mæla til serligt varsemi við gestum í skúlatíð. Tískil avmarka vit okkum til at gestir í minni mun enn vanligt koma í skúlan í skúlatíð, og at hesir eru serliga ansnir við hondreinføri, frástøðu og smittuvanda annars. 

Foreldur kunnu fylgja børnum í skúla sum vanligt og avheinta børnini aftur sum vanligt. 

Handreinføri 

Vit spritta okkum um hendurnar í durinum á veg inn og á veg út úr skúla. Harumfamt vaska vit okkum um hendurnar, tá ið tímarnir byrja og aftur, tá ið tímarnir enda.  

Vasking 

Skúlin verður vaskaður eftir skúlatíð. Vaskitoymið vaskar allan skúlan dagliga eftir leiðreglunum um reinføri á skúlum og stovnum.  

Frástøða 

Vit gera okkum ómak at halda neyðuga frástøðu, har hetta ber til. 

Sjúkueyðkenni 

Hevur barn tykkara sjúkueyðkenni, eisini mild sjúkueyðkenni, skulu tey ikki koma í skúla. Hevur barn tykkara fingið boð um at lata seg kanna fyri korona-smittu ella tit sjálvboðin hava latið barnið kannað, verða tit biðin um at hava barnið heima til úrslitið av kanningini er tøkt. Myndugleikarnir mæla til, at øll, ið hava sjúkueyðkenni, lata seg kanna.  

Hetta sama er eisini galdandi fyri starvsfólk .

Persónlig amboð 

Tað er framvegis týdningarmikið, at barn tykkara hevur egnan pennahúsa við øllum amboðum - blýantar, litblýantar, blýantspískara, viskileður, liniál, saks, límstift v.m. - við í skúla. Alt tað, ið tey hava brúk fyri í undirvísingini.  

Fráboðanir um sóttarhald og sjúku

Allar fráboðanir um sóttarhald ella staðfesta smittu fara gjøgnum flokslæraran. Foreldur kunna flokslæraran um sína støðu og flokslærarin kunnar foreldur í sínum flokki eftir tørvi.

Spurningnar og ivamál 

Hava tit spurningar ella ivamál um hesi viðurskifti, eru tit altíð vælkomin at seta tykkum í samband við flokslæraran.
Eisini eru tit vælkomin at seta tykkum í samband við leiðslu skúlans. 

Sí annars leinkið niðanfyri til www.corona.fo 

Vinarliga  

Fríðbjørg Hammer, fyrstilærari